شهریار سایتینین خبرینه گؤره، یعقوب هوشیار خبر شبکهسی ایله مصاحیبهده شهرین یارارسیز و الدن توشموش منطقه لرینین یئنیلشدیرمه ساحهسینده بلدییهنین فعالیتلرینی ایضاح ائدیب و بیلدیریب: تبریزین ۲۳۰ مین وطنداشین مسکن سالدیغی ۲ مین ۳۰۰ هکتار غیر استاندارد و کوهنلمیش محلله لری وار.
او، تبریز بلدییهسینین کوهنلمیش منطقه لرینی یئنیلشدیرمه ساحهسیندهکی اؤزل تشویق طرح لرینه اشاره ائدرک، بئله دئدی: شهر یئنیلشدیرمه ساحهسینده اؤزل سیاستلرین تطبیقی، وضعیتی یاخشیلاشدیرماقدا مثبت تأثیر بوراخیب و بئلهلیکله بو طرحلرین تطبیقیندن سونرا تبریزین کوهنه لمیش (فرسوده) منطقه لرده تیکینتی اجازه لرینین ساییندا آرتیش اولوب.
تبریز بلدیهباشقانی، ۱۴۰۱-جی ایلده تبریز شهرینین کوهنلمنیش منطقه لرینده ۳۵۰ مین متر مربع تیکینتی مجوزی وئریلدیگینی بیلدیرهرک، علاوه ائدیب: بو رقم ۱۴۰۲-جی ایلده ۴۵۰ مین متر مربع یه یوکسهلیب.
یعقوب هوشیار همچینین بو ایلین ۱۰ آییندا، فرسوده و کوهنله لمیش منطقه لرده وئریلن تیکینتی اجازه لرینین ساحهسینین ۳۷۰ مین متر مربع اولدوغونو اعلان ائدیب و دئییب: تبریز بلدییهسی شهرین ثمره سیز و کوهنه لمنیش منطقه لرینده ۳ مرتَبهیه قدر تیکینتی اجازه سی پولسوز وئریر.
هوشیار، اینکیشاف برنامه لرینه گؤره دولتین موهنه لمیش منطقه لره گؤره عهدهلیکلرینه ایشاره ائدهرک خاطیرلادیب: آلتینجی اینکیشاف برنامه سینده دولت شهرلرین فرسوده منطقه لرینین ایلده ۱۰ % یئنیلشدیرمهیه و یئنیلشدیرمه خرجلرینین ۷۰ % اؤز عهده سینه گؤتورمهیه مکلف ائدیلمیشدی، اما تاسفله بو طرح حیاتا کئچیریلمهییب.
او، یئددینجی اینکیشاف برنامه سینین بلدییهلر اوچون ان پیس اینکیشاف پروگرامی اولدوغونو سؤیلهیهرک بیلدیریب: بؤیوک شهرلرین مسئله لری یئددینجی اینکیشاف پروگرامیندا نظرده آلینماییب و بلدییهلرین اختیاراتی پروگراملاردا آزالدیلیب.
تبریز بلدیه رئیسی همچینین تاریخی منطقه نین هویتینی قورویوب ساخلاماغین اهمیتینه اشاره ائدیب دئدی: شهرده ۳۰۱ قئید اولونموش تاریخی اثر وار و تبریز بلدییهسی ده شهرین توریزم پوتانسیالینین آرتیرماسی مقصدی ایله تاریخی ائولرین صاحیبلَنمَسینده رول ایفا ائدیب.
یعقوب هوشیار، اجرا اولونان قانون و قایدالارین تبریزین مرکزی منطقه سینی اهالی دن بوشالماسینا سبب اولدوغونو دئیهرک، بیلدیریب: بئله کی، تبریزین تاریخی منطقه لری تفصیلی طرحی حاضیرلانیب و بو طرح یاخین گلهجکده بلدییهنین اون منطقه سینه ابلاغ اولوناجاق.
