شهریار سایتینین خبرینه گؤره، کرامت گونلری بایرامی چرچیوهسینده تبریز بلدیه پروژهلرینین آچیلیشی داوام ائدیر. بو چرچیوهده حجتالاسلام والمسلمین احمد مطهری اصل، یعقوب هوشیار (تبریزین بلدیه رئیسی)، شورا عوضولری و ورزشچیلارین حضورو ایله ستارخان استخری آچیلدی.
تبریزین بلدیه رئیسی یعقوب هوشیار ستارخان استخرینین آچیلیشی مراسمینده دئدی: “تبریزین غرب منطقه سینده ستارخان استخرینین آچیلماسی، جوانلارین و اوشاقلارین ایدمان ساحهسینده تحصیلینی، استعداد آختاریشینی و میلّی و بینالخلق ساحهلره تانیدیلماسینی مومکون ائدیر.”
او دئدی: “ستارخان استخری تبریز بلدیهسینین آچدیغی ۳۰-جو ایدمان پروژهسیدیر و باشقا ایدمان پروژهلری ده آچیلماغا حاضیردیر.”
بلدیه رئیسی مارالان منطقهسینده باشقا بیر استخرین اینشا ائدیلدیینی و بو ایلین آخیرینا قدر ایستیفادهیه وریلهجگینی بیلدیردی.
هوشیار ایدمان و ساغلاملیق زیرساختلارینین گلیشدیریلمهسینده بلدیهنین چالیشمالارینی آرتیرماق ایستهدیگینی و تبریزلی لره ساغلاملیق، جانلیلیق و شادلیق گتیرمک ایستهدیگینی ده قئید ائتدی.
بلدیه رئیسی مکتبلرده ایدمان استعدادلارینین آختاریشینین باشلادیغینی بیلدیره رک، آذربایجان منطقهسینین و خصوصاً تبریزین بینالخلق و میلّی ساحهلرده اؤنملی ایدمان استعدادلارینا صاحیب اولدوغونو و شورا و بلدیهنین بو استعدادلاری کشف ائدیب، گلیشدیرمک و تانیتماق اۆچون چالیشدیغینی دیله گتیردی.
هوشیار سون اولاراق، “قیسا زاماندا تبریز بلدیهسینین استعداد آختاریش برنامه لرینین میلّی و بینالخلق ساحهلرده مؤثّر اولدوغونو گؤرهجگیز” دئدی.
