تبریز بلدیه رئیسی یعقوب هوشیار دئدی: بو ایل تبریز بلدیهسینین اولویتلی پروژهلری شهرین موختلیف منطقهلرینده یول آچیلماسی دیر و بو اساسدا، ایلین سونونا قدر ۲۲ خیابان آچیلماسی تماملانیب همشهری لرین خدمتینه حضر اولاجاق.
شهریار سایتینین خبرینه گوره، یعقوب هوشیار، تبریز بلدیه رئیسی، شهید آیتالله آلهاشم ۴۵ مترلیک یول آچیلماسی پروژهسینه اولان زیارت زامانی بو پروژهنی تبریزین تاریخنده ان چتین یول آچیلماسی اولاراق آدلاندیردی و دئدی: بو بؤیوک طرحین خدمته حاضر اولما مرحلهسینه چاتماسی، منطقهده یاشایان اهالینین همدلی و دستکلری ایله مومکون اولوبدور.
او، اهالینین صبری و همکاریلارینا تشککور ائدهرک، بونون کیمی بیر پروژهنین اجراسی زامانی یارانان چتینلیکلر اوچون عذر ایسته دی و دئدی: «شهید آیتالله آلهاشم ۴۵ مترلیک یول آچیلماسی، یئر فورماسی، سیخ بافت، ارتفاع فرقلری و میلّی اراضیلرین اولماسی سببیله، تبریزده حیاتا کئچیریلمیش ان چتین پروژهدیر.»
هوشیار دئدی: بو پروژهنین اجراسی زامانی ۸۸۰ ملک تملک ائدیلیب و تملک اولونان اراضیلرین ساحهسی ۳۵ مین متر مربع یه چاتیر.
تبریز بلدیه رئیسی، تبریزین هاوا وضعیتینین محدودلوقلاری سببیله ایش فصلینین قیسا اولدوغونو بیلدیردی و دئدی: شهرین عمرانی پروژهلری اوچون اجرا مدتی چوخ محدوددور، اما بو پروژهده چالیشانلارین زحمتی ایله ایندی خیدمته حاضر مرحلهیه چاتمیشدیر.
هوشیار بوندان علاوه، بو ایلین سونونادک شهرین موختلیف منطقهلرینده ۲۲ خیابان آچیلماسی پروژهسینین تماملانیب خیدمته گیرهجگینی آچیقلادی.
او، سون اولاراق، ۱-جی منطقهنین بلدیه رئیسینه مخاطب اولاراق، بو یولون آچیلماسیندان سونرا قالان جزییاتلارین دوزلدیریلمهسی و پروژهنین دقیق اجرا اوْلونماسی اوچون چالیشیلماسینی ایسته دی، تاکی بو منطقهده امنیتلی و هدفلی بنالارین آرتماسی ایله قیمت آرتیمی یارانسین.
